BAK Det er på baksida av Hovudbygningen at arbeida i all hovudsak skal foregå. FOTO: STATSBYGG

I andre halvdel av juni vil Statsbygg kunngjere konkurransen om bygging av delprosjekt P5 Hovudknutepunkt i NTNU Campussamling. Prosjektet omfattar rehabilitering av NTNUs historiske hovudbygning på Gløshaugen og oppføring av eit mindre tilbygg.

– Dette er eit svært sentralt prosjekt i campussamlinga, kor vi både skal ta vare på viktige kulturhistoriske verdiar og samtidig utvikle eit moderne universitetsbygg, seier Statsbyggs prosjektdirektør for NTNU Campussamling, Johan Arnt Vatnan.
 
Hovudbygningen som inngår i prosjektet er freda, og arbeidet vil skje i tett dialog med antikvariske myndigheiter. Bygningen representerer sentrale delar av NTNUs historie, og stiller særskilde krav til både planlegging og gjennomføring.
 
Kort om prosjektet
 
P5 Hovudknutepunkt blir eit sentralt universitetsbygg med funksjonar for undervisning, læring og felles møteplassar. Prosjektet består av:
 
•    Rehabilitering av eksisterande hovudbygning (ca. 8 000 m²)
•    Påbygg mot Gløshaugplatået (ca. 2 900 m²)
•    Totalt om lag 10 900 m² bygningsmasse
 
Bygget skal romme undervisningsareal, bibliotek, rektorat, studentarbeidsplassar, og sentrale knutepunktfunksjonar som kafé og bokhandel. Prosjektet er ein del av NTNU Campussamling, som skal samle fagmiljøa og legge til rette for auka samarbeid, tverrfagleg arbeid og kvalitet i utdanning, formidling og forsking.
 
Konkurransen
 
Entreprisen blir gjennomført som ein totalentreprise med samspel. Modellen er delt i to fasar:
 
•    Fase 1: prosjektutvikling, optimalisering og planlegging
•    Fase 2: detaljprosjektering og bygging
 
Konkurransen blir gjennomført som ein avgrensa konkurranse med forhandling, der eit utval tilbydarar blir invitert til å levere tilbod.
 
Marknadsmøte i juni
 
I forbindelse med kunngjeringa inviterer Statsbygg til eit marknadsmøte for aktuelle leverandørar.
 
•    Tid: 26. juni 2026 kl. 10.00–11.30
•    Stad: Statsbygg sitt prosjektkontor i Professor Brochs gate 2, Trondheim
 
På møtet vil Statsbygg presentere prosjektet og sentrale element i konkurransegrunnlaget, og dessutan svare på spørsmål frå marknaden. Leverandørar blir oppfordra til å stille spørsmål på førehand via Mercell.
 
Praktisk informasjon
 
Konkurransen blir kunngjord i Doffin og Mercell før marknadsmøtet. Frist for å levere førespurnad om deltaking er sett til 7. august 2026 kl. 12.00.