Opna moderne bygg på historisk grunn
APPLAUS Studentane følger med framfor den oransje trappa, som er binder bygget saman frå bakkeplan til sjette etasje. FOTO BORGAR SAGBAKKEN/SIT
Opna moderne bygg på historisk grunn
Namnet har nesten 1000 år gamle røter i Trondheim, men innanfor dørene kan NTNU og Studentskipnaden no tilby undervisning og trening i topp moderne lokale.
Helgasetr samlar NTNUs helse- og sosialfag og Studentsamskipnadens (Sit) idretts- og serveringstilbod under same tak.
– For eit fantastisk bygg! Dette blir ein sentral møteplass for nokre av dei viktigaste profesjonsutdanningane vi har i landet. Vi treng at folk frå fleire fag jobbar saman når vi skal løyse dei store samfunnsutfordringane framover, sa forskings- og høgare utdanningsminister Oddmund Hoel under opninga måndag 2. september, og la til:
– Eg er òg glad for å sjå at studentane får ein så flott plass til trening og fysisk aktivitet. Så har eg skjønt at helse- og sosialfaga òg vil ta i bruk idrettsareala til undervisning og forsking – så her snakkar vi verkeleg vinn-vinn for folkehelsa!
Byggherredirektør Marius Tunstad i Statsbygg la i talen sin vekt på berekraft, og kunne stolt fortelje at bygget har oppnådd sertifiseringa BREEAM-nor Excellent.
– Det er ei utmerking som viser at bygget har oppnådd svært gode berekraftige løysingar. Det har blant anna eit stort solcelleanlegg på taket, og det er òg planlagt og bygd som eit nullutsleppsbygg i drift, sa Tunstad.
Ei myldrande maurtue
Hjarte i Helgasetr er eit stort atrium, ope frå bakkeplan til glastaket i sjette etasje. Ei spektakulær oransje trapp snor seg opp gjennom bygget.
I Sits kantine i atriet kan du nyte ein roleg kaffi medan du ser fartsfantom sveitte på tredemølle, grupper ha yogatime, muskelgjengar løfte vektar eller fingersterke finne kjappaste rute oppover det 14 meter høge klatretårnet i nordvestre hjørne.
Namnet Helgasetr går tilbake til 1100-talet. Augustinarklosteret Monasterium «Sanctæ Sedis», eller Elgisetr kloster, blei reist på det som tidlegare var ein gard ved Nidelva. Elgi skal vise til ein gammal kultstad eller heilagdom, og det norrøne Elgisetr blei skriftliggjort som Helgasetr. Då det nye bygget i Elgeseter gate skulle realiserast blei det halde ein namnekonkurranse, og med den historiske susen sin blei Helgasetr vinnaren.
