Statsbygg har funne botemiddelet for krykkja
PÅ FASADEN Slik så det ut etter at krykkja flytta inn på den eine fasaden til Nordnorsk kunstmuseum i Tromsø i fjor.
Måkefuglar som hekkar i vindaugskarmar både bråkar, øydelegg husfasadar og hindrar byggjearbeid. No har Statsbygg løyst problemet ved Nordnorsk Kunstmuseum.
Krykkja er sterkt trua og på raudlista. Ho hekkar i fjell, eller i vindaugskarmen på husfasadar. Der gjer ho frå seg der ho sit, men ho gjer ikkje reint etter seg.
Det gjer den mellomstore måkearten til ein mindre populær nabo langs kysten. I fjor hadde Statsbygg planar om å renovere dei tre fasadane på Nordnorsk Kunstmuseum, men rakk berre to. Fuglane hadde flytta inn på den tredje, noko fasaden og fortauet under bar tydeleg preg av.
– Krykkja var rett og slett for rask for oss i fjor, men i år var vi føre var. Den siste fasaden har vi no renovert. På fasadane brukte vi eit middel som reflekterer lys. Det oppfattar krykkja som eld, noko som gjer at ho ikkje set seg der, fortel Statsbyggs underdirektør Sigurd Lund.
Middelet er relativt nytt, så sjølv om det blir brukt fleire stadar er erfaringa med det avgrensa. På sikt kan det vere ei fare for at fuglane ven seg til det.
– Det høyrer òg med til historia at krykkja i staden har etablert seg på taket til stillasa. Dermed vil rivinga av stillasa kome i konflikt med fuglane. Tromsø kommune eig grunnen inntil museet, og vi må dermed leige grunnen til fuglen har floge. Det hadde vore betre med ein fugl i handa enn 10 på taket!
Flytta krykkjene inn på hotell
Krykkjene har vore ein del av Tromsø sitt bybilete i fleire år. Trass i at krykkjene ikkje angrip menneske, kan dei oppfattast irriterande med mykje lyd og tilgrising. Ein ting er at fasadane ikkje ser særleg pene ut, men tilgrisinga inneheld òg syre som kan øydelegge murpussen.
Statsbygg har hatt same problem på eit av sine andre bygg i Tromsø, nemleg Framsenteret. Her fann dei ei original løysing saman med kommunen i forfjor. Blant anna sett dei opp krykkehotell for å unngå busetting på fasadane.
– Fuglane fekk tilbod om hotellplass, medan vi fekk beskytta fasaden på Framsenteret med nett føre vindauga. Det løyste problemet med krykkjene, som synest å trivast på hotell, fortel Lund.
