Statsbygg kjøper bustadprosjekt på Svalbard
Categories:
alle
Views: 204
REKKE Blokka lengst til høgre skal no oppførast og etter planen stå ferdig våren 2024.
Det er stort behov for nye bustadar i Longyearbyen. No kjøper Statsbygg ein planlagt blokk med 27 leilegheiter, som skal stå ferdig våren 2024.
– Gode bustadar er viktige for å halde ved lag Longyearbyen som eit lokalsamfunn. Mange av dagens bustadar her er små og har behov for utbetringar. Dette prosjektet vil utgjere ein betydeleg forskjell for offentleg tilsette på Svalbard, seier administrerande direktør Harald Nikolaisen i Statsbygg.
Statsbygg har det seinaste året greidd ut moglegheita for å kjøpe bustadprosjektet i veg 507 i Longyearbyen. Den planlagde blokka består av to delar på høvesvis tre og fire etasjar, som saman rommar 27 leilegheiter og ein næringsseksjon.
No er det klart at Statsbygg kjøper blokka av Svalbard Utbygging AS. Blokka har eit totalt areal på 3480 m2 og skal byggast av entreprenøren Consto Svalbard.
Leilegheitene er store familieleilegheiter på tre og fire rom, som det er mangel på i Statsbyggs portefølje, og tre av leilegheitene er òg universelt forma. Planlagt byggestart er november 2022, med planlagt ferdigstilling våren 2024.
Høge klimaambisjonar
Som ny eigar har Statsbygg auka klimaambisjonane i prosjektet. Med blant anna tjukkare isolering og vindauge av høgare kvalitet er blokka oppgradert til passivhusstandard. I tillegg er bygget endra til å kunne tole lasta av eit framtidig solcelleanlegg på taket.
– Ettersom straumen og fjernvarmen på Svalbard framleis kjem frå kolkraft vil tiltaka anslagsvis gi ei klimagassinnsparing på over 300 tonn Co2 årleg, seier Nikolaisen.
Dei nye leilegheitene vil inngå som ein del av den såkalla bustadpoolen i Longyearbyen, som Statsbygg forvaltar og drifter på vegner av staten. Bustadpoolens mandat er blant anna å sikre dekning av bustadar til tilsette i offentleg sektor. Bustadpoolen består i dag av 220 bueiningar som staten ved Statsbygg eig, og 65 bueiningar som staten ved Statsbygg leiger.
